కెప్టెన్​గా తప్పు చేశా.. అందుకే వాళ్లు బాల్​తో ఒకటి పీకారు: కేఎల్ రాహుల్

ఐపీఎల్ పదహారో సీజన్​లో లక్నో సూపర్ జెయింట్స్ జట్టు దూసుకెళ్తోంది. వరుస విజయాలతో ప్రత్యర్థి టీమ్స్​కు సవాల్ విసురుతోంది. పటిష్టమైన రాజస్థాన్ రాయల్స్​తో బుధవారం జరిగిన మ్యాచ్​లో 10 రన్స్ తేడాతో గెలిచి మరో విక్టరీని ఖాతాలో వేసుకుంది. దీంతో పాయింట్ల పట్టికలో రెండో స్థానానికి ఎగబాకింది. ఈ మ్యాచ్​లో తొలుత బ్యాటింగ్​కు దిగిన లక్నో నిర్ణీత ఓవర్లలో 7 వికెట్ల నష్టానికి 154 రన్స్ చేసింది. ఓపెనర్ కేఎల్ రాహుల్ (32 బాల్స్​లో 39), కైల్ మేయర్స్ (42 బాల్స్​లో 51) ఆకట్టుకున్నారు. స్టొయినిస్ (21), పూరన్ (29) కూడా రాణించారు. రాయల్స్ బౌలర్లు కట్టుదిట్టంగా బౌలింగ్ చేయడంతో స్కోరు 150 దాటుతుందా అని అనిపించింది. కానీ పూరన్ హిట్టింగ్​తో మంచి లక్ష్యాన్ని ప్రత్యర్థి ముందు ఉంచింది. ఆ తర్వాత  ఛేదనకు దిగిన రాజస్థాన్​కు అదిరిపోయే ఆరంభం లభించింది.

యశస్వి జైస్వాల్ (44), జోస్ బట్లర్ (41) రాయల్స్​కు శుభారంభాన్ని అందించారు. అయితే దీన్ని ఆ జట్టు సద్వినియోగం చేసుకోలేకపోయింది. మోస్తరు లక్ష్యాన్ని ఛేదించలేక చతికిలపడింది. ఆవేశ్​ ఖాన్ మూడు వికెట్లతో చెలరేగాడు. స్టొయినిస్, నవీన్ ఉల్​ హక్ చెరో రెండు వికెట్లతో రాజస్థాన్​ బ్యాటర్లను అద్భుతంగా కట్టడి చేశారు. మధ్యలో కాస్త నెమ్మదిగా ఆడటంతో ఇన్నింగ్స్ చివర్లో కొట్టాల్సిన స్కోరు పెరిగిపోయింది. పడిక్కల్, రియాన్ పరాగ్ హిట్టింగ్ చేసినా ప్రయోజనం లేకపోయింది. ఇక, మ్యాచ్ గెలిచిన అనంతరం లక్నో సారథి కేఎల్ రాహుల్ ఫన్నీగా చేసిన ఒక స్టేట్​మెంట్ ఇప్పుడు నెట్టింట వైరల్ అవుతోంది.

ఫీల్డింగ్ చేస్తున్న టైమ్​లో సహచరులు విసిరిన ఒక త్రో కారణంగా రాహుల్ మోచేతికి స్వల్ప గాయమైంది. దీనిపై రాహుల్ మాట్లాడుతూ.. ‘సహచరులు విసిరిన త్రో వల్ల చిన్న గాయమైంది. దీని గురించి అంతగా పట్టించుకోవాల్సిన పనిలేదు. ఆ సమయంలో నాకో విషయం స్పష్టమైంది. సారథిగా నేనేదో తప్పు చేస్తున్నట్లున్నాను. అందుకే సహచరులు నన్ను బాల్​తో ఒకటి పీకి అలర్ట్ చేశారేమో’ అని నవ్వుతూ చెప్పాడు రాహుల్. అతడి వ్యాఖ్యలపై నెటిజన్స్ రకరకాలుగా స్పందిస్తున్నారు. రాహుల్​కు ఒకటి పీకి చెబితే గానీ అతడి బుర్రకెక్కదు అంటున్నారు. కేఎల్ జిడ్డు బ్యాటింగ్​తో విసుగిస్తున్నాడని కామెంట్స్ చేస్తున్నారు. బౌలర్ల పుణ్యమా అని బయటపడ్డారు కానీ.. రాజస్థాన్​తో మ్యాచ్​లో ఓడిపోయేవాళ్లని మరికొందరు అంటున్నారు.

ఈరోజు ఏపీ, తెలంగాణకు సంబంధించిన లేటెస్ట్ న్యూస్.. జాతీయ, అంతర్జాతీయ వార్తలు.. ఎడ్యుకేషన్, బిజినెస్, సినిమా, స్పోర్ట్స్, టెక్ అప్డేట్స్.. ఆధ్యాత్మిక, ఆరోగ్య సమాచారంతో పాటు, వైరల్ కథనాల కోసం సుమన్ టీవీ యాప్‌ను డౌన్‌లోడ్ చేసుకోండి.