ముంబై గెలుపులో సూర్య కాదు.. అతడే కీలకం!

ముంబై ఇండియన్స్ జట్టు ప్లేఆఫ్స్ దిశగా వడివడిగా అడుగులు వేస్తోంది. వరుస విజయాలు సాధిస్తూ తమ క్వాలిఫికేషన్ అవకాశాలను పెంచుకుంటోంది. శుక్రవారం గుజరాత్ టైటాన్స్​తో జరిగిన మ్యాచ్​లో ఆ జట్టు 27 రన్స్ తేడాతో విక్టరీ కొట్టింది. ఈ మ్యాచ్​లో తొలుత రోహిత్ సేన బ్యాటింగ్​కు దిగింది. నిర్ణీత 20 ఓవర్లలో ముంబై ఇండియన్స్ 218 రన్స్ భారీ స్కోరు చేసింది. ఓపెనర్లు ఇషాన్ కిషన్ (31), రోహిత్​ శర్మ (29) జట్టుకు మంచి స్టార్ట్​ను అందించారు. ఆ తర్వాత సూర్యకుమార్ యాదవ్ (103) సెంచరీతో చెలరేగడంతో గుజరాత్ ముందు భారీ టార్గెట్​ను ఉంచింది ముంబై. మిస్టర్ 360 గ్రౌండ్ నలువైపులా షాట్లు కొడుతూ ప్రేక్షకులను అలరించాడు. అతడికి ఎలా బౌలింగ్ చేయాలో గుజరాత్ బౌలర్లకు పాలుపోలేదు. అనంతరం భారీ లక్ష్య ఛేదనలో గుజరాత్ టైటాన్స్ తేలిపోయింది. ఆ జట్టుకు శుభారంభం దక్కలేదు.

టైటాన్స్ ఓపెనర్లు వృద్ధిమాన్ సాహా (2), శుబ్​మన్ గిల్ (6)తో పాటు సారథి హార్దిక్ పాండ్యా (4) తక్కువ స్కోర్లకే పెవిలియన్​కు చేరారు. విజయ్ శంకర్ (29), డేవిడ్ మిల్లర్ (41)లకు శుభారంభాలు లభించినప్పటికీ వాటిని భారీ స్కోర్లుగా మలచలేకపోయారు. ఆ తర్వాత బ్యాటింగ్​కు దిగిన ఆల్​రౌండర్ రషీద్ ఖాన్ (32 బాల్స్​లో 79) సునామీ ఇన్నింగ్స్ ఆడాడు. ఏకంగా 10 సిక్సులతో ముంబై బౌలర్లకు చుక్కలు చూపించాడు. అతడికి సహకరించే మరో బ్యాట్స్​మన్ క్రీజులో ఉండి ఉంటే గుజరాత్​ సులువుగా మ్యాచ్ గెలిచేది. రషీద్ ఖాన్ బ్యాటింగ్​లోనే కాదు బౌలింగ్​ కూడా అద్భుతంగా చేశాడు. 4 వికెట్లతో మరోమారి సత్తా చాటాడు. గుజరాత్ మీద ముంబై గెలుపులో అందరూ సూర్యకుమార్ యాదవ్​కు ఎక్కువ క్రెడిట్ ఇస్తున్నారు. అద్భుతమైన సెంచరీతో చెలరేగిన సూర్యకుమార్ ముంబై సక్సెస్​లో ప్రధాన పాత్ర పోషించాడు.

సూర్యకుమార్ కాంట్రిబ్యూషన్​ను కాదనలేం. కానీ ముంబై విక్టరీలో మరో ప్లేయర్ కీలక పాత్ర పోషించాడు. అతడే పేసర్ ఆకాష్​ మధ్వాల్. లక్ష్య ఛేదనకు దిగిన గుజరాత్​ను ఇన్నింగ్స్ ఆరంభంలోనే కోలుకోలేని దెబ్బతీశాడు మధ్వాల్. ఓపెనర్లు సాహా, గిల్​ను తక్కువ స్కోర్లకే పెవిలియన్​కు పంపాడు. ముఖ్యంగా గిల్​ను అతడు క్లీన్ బౌల్డ్ చేసిన విధానం సూపర్బ్ అనే చెప్పాలి. ఆ తర్వాత జోరు మీద ఉన్న మిల్లర్​ను చక్కటి బాల్​తో వికెట్ల ముందు దొరకబుచ్చుకున్నాడు. 4 ఓవర్లు వేసిన మధ్వాల్.. 31 రన్స్ ఇచ్చి 3 కీలక వికెట్లు పడగొట్టాడు. గిల్​ క్రీజులో కుదురుకున్నా, మిల్లర్ మరింత ఎక్కువ సేపు ఆడున్నా ముంబైకి మ్యాచ్ గెలవడం కష్టం అయ్యేది. ఆ ఇద్దర్నీ ఔట్ చేసిన మధ్వాల్​ను మెచ్చుకోక తప్పదు. గుజరాత్​పై గెలుపులో మంచి కాంట్రిబ్యూషన్ ఇచ్చిన మధ్వాల్​పై సోషల్ మీడియాలో నెటిజన్స్ ప్రశంసల జల్లులు కురిపిస్తున్నారు.

Massive wicket! 🙌

Akash Madhwal gets another wicket and now that of Shubman Gill#GT are 48/3 after 6 overs

Follow the Match: https://t.co/o61rmJX1rD#TATAIPL | #MIvGT pic.twitter.com/ApdERw7HE2

— IndianPremierLeague (@IPL) May 12, 2023

ఈరోజు ఏపీ, తెలంగాణకు సంబంధించిన లేటెస్ట్ న్యూస్.. జాతీయ, అంతర్జాతీయ వార్తలు.. ఎడ్యుకేషన్, బిజినెస్, సినిమా, స్పోర్ట్స్, టెక్ అప్డేట్స్.. ఆధ్యాత్మిక, ఆరోగ్య సమాచారంతో పాటు, వైరల్ కథనాల కోసం సుమన్ టీవీ యాప్‌ను డౌన్‌లోడ్ చేసుకోండి.