బ్యాంకు ఖాతాల్లో రూ.35 వేల కోట్లు.. ఇందులో మీ డబ్బులు ఉన్నాయేమో చెక్ చేసుకోండి!

సంపాదించేది పది రూపాయలైనా అందులో నాలుగు రాళ్లు బ్యాంకుల్లో దాచుకోవడం అన్నది ఈ రోజుల్లో కామన్. భవిష్యత్తులో ఏ కష్టమొస్తుందో.. ఏ అవసరమొస్తుందో అన్న భయంతో దాచుకునేవారు కొందరైతే.. బ్యాంకుల్లో అయితే మన డబ్బు ఎక్కడికి పోదు.. భద్రంగా ఉంటుందన్న నమ్మకంతో దాచుకొనేవారు మరికొందరు. ఇలా ప్రజలందరూ కలిసి దేశమంతటా ఉన్న బ్యాంకుల్లో కొన్ని లక్షల కోట్ల రూపాయలు డిపాజిట్ చేసుంటారు. అందులో కొంత మొత్తాన్ని వారి రోజువారీ అవసరాల కోసం విత్ డ్రాయల్ చేస్తున్నప్పటికీ.. కొంత మొత్తాన్ని అందులోనే దాస్తుంటారు. కానీ, ఒకసారి బ్యాంకుల్లో దాచాక మళ్లీ ఆ డబ్బు కోసం ఎవరూ రాకపోతే ఏమవుతుందో తెలుసా..! ప్రభుత్వానికి చెందుతుంది.

అలా గత పదేళ్లుగా ఎవరూ క్లెయిమ్‌ చేయని 35వేల కోట్ల రూపాయలను ప్రభుత్వ రంగ బ్యాంకులు రిజర్వ్‌ బ్యాంక్‌ ఆఫ్‌ ఇండియా(ఆర్‌బీఐ)కి బదిలీ చేసినట్లు కేంద్ర ఆర్థిక శాఖ సహాయ మంత్రి భగవత్‌ కరాడ్‌ వెల్లడించారు. ఈ డిపాజిట్లు 10.24 కోట్ల ఖాతాలకు సంబంధించినవి అని ఆయన పేర్కొన్నారు. సాధారణంగా 10 ఏళ్లు లేదా అంతకుమించి క్రియాశీలకంగా లేని డిపాజిట్లను అన్‌క్లెయిమ్డ్‌ డిపాజిట్లుగా వ్యవహరిస్తారు. ఈ అన్‌క్లెయిమ్డ్‌ డిపాజిట్లు ఎక్కువగా ఉన్న బ్యాంకుల్లో.. రూ.8,086 కోట్లతో ఎస్‌బీఐ అగ్రస్థానంలో ఉండగా.. పంజాబ్‌ నేషనల్‌ బ్యాంక్‌ (రూ.5,340 కోట్లు), కెనరా బ్యాంక్‌ (రూ.4,558 కోట్లు), బ్యాంక్‌ ఆఫ్‌ బరోడా (రూ.3,904 కోట్లు) తరువాతి స్థానాల్లో ఉన్నాయి. మరీ ఇంత భారీ మొత్తంలో డబ్బులు ఎలా ఉండిపోయాయ్‌? ఒకవేళ ఖాతాదారుడు మరణించాడనుకుంటే.. అతని ఖాతాలోని డబ్బును వారి కుటుంబాలు క్లెయిమ్‌ చేసుకునేందుకు వీలుగా బ్యాంకులు వెసులుబాటు కల్పిస్తున్నాయి. అలాంటప్పుడు ఇంత మొత్తంలో అన్‌క్లెయిమ్డ్‌ డిపాజిట్లు ఎలా ఉంటున్నాయని మార్కెట్ నిపుణులు ప్రశ్నిస్తున్నారు.

ఈ నేపథ్యంలో క్లెయిమ్ చేయని నగదును సంబంధిత వ్యక్తులకు అందించేందుకు కేంద్ర ప్రభుత్వం ప్రయత్నాలు మొదలుపెట్టింది. ఇందు కోసం మార్గదర్శకాలను సిద్ధం చేయాల్సిందిగా ఆర్థికశాఖ నిపుణులకు ఆర్థిక మంత్రి నిర్మలా సీతారామన్ సూచనలు జారీ చేశారు. ఇప్పటికే బ్యాంకుల్లో ఉన్న అన్‌క్లెయిమ్డ్ డిపాజిట్ల వివరాలు తెలుసుకునేందుకు రిజర్వ్ బ్యాంక్ ఆఫ్ ఇండియా కామన్ పోర్టల్ అందుబాటులోకి తీసుకొచ్చి సంగతి తెలిసిందే. అలాగే బ్యాంకులు సైతం తమ అధికారిక వెబ్ సైట్ ద్వారా ఆ వివరాలు తెలుసుకునే వెసులుబాటు కల్పించాయి.

SPECIAL DRIVE FOR UNCLAIMED DEPOSITS ! FM Nirmala Sitharaman calls for special drive to help people get their unclaimed deposits in banks ?? pic.twitter.com/YsbFXWMGxn

— shashwat amrev (@AmrevShashwat) May 11, 2023

మీ డబ్బు ఉందేమో అని ఎలా తెలుసుకోవాలంటే..

• ముందుగా మీ అకౌంట్ ఉన్న బ్యాంకు అధికారిక వెబ్‌సైట్‌లోకి వెళ్లాలి. అనంతరం సెర్చ్ ఇంజిన్‌లో అన్‌క్లెయిమ్డ్ డిపాజిట్ అని సెర్చ్ చేసి.. ఆ లింక్‌పై క్లిక్ చేయాలి.
• లేదంటే మీ అకౌంట్ ఉన్న బ్యాంకు పేరుతో అన్‌క్లెయిమ్డ్ డిపాజిట్ అని టైపు చేయాలి. ఉదాహరణకు ఎస్‌బీఐ ఖాతాదారులైతే.. ‘SBI unclaimed deposits’ అని టైప్ చేయాలి.
• అనంతరం మీ వ్యక్తిగత వివరాలైన పేరు, పుట్టిన తేదీ, అడ్రస్ వంటి పొందుపరిచి మీ వివరాలు తెలుసుకోవచ్చు.
• కొన్ని బ్యాంకులు వ్యక్తిగత వివరాలతో పాటు పాన్ లేదా ఇతర ఐడెంటిటీ కార్డు వివరాలు అడుగుతున్నాయి. అవసరమైన వివరాలు అందించిన తర్వాత లిస్ట్‌లో మీ పేరు, చిరునామా కనిపిస్తాయి.
• ఇలా చెక్ చేశాక అన్‌క్లెయిమ్డ్ డిపాజిట్లలో మీ డబ్బు ఉన్నచో బ్యాంకు బ్రాంచ్‌ను సంప్రదించాల్సి ఉంటుంది.
• క్లెయిమ్ చేయాలనుకునే వారు, ఒక దరఖాస్తు ఫారంతో పాటు గుర్తింపు ధ్రువీకరణ పత్రాలను జత చేయాల్సి ఉంటుంది.
• అప్లికేషన్ ఫారమ్ బ్యాంకులో సమర్పించాక మీ బ్యాంకు ఖాతాను ఆపరేటివ్‌గా మారుస్తారు.
• ఒక వేళ ఖాతాదారుడు మరణించినట్లయితే నామినీ లేదా ఖాతాదారుడి వారసులు బ్యాంకును సంప్రదించి, అడిగిన వివరాలు అందించాలి. అనంతరం బ్యాంక్ నిబంధనల మేరకు ఈ డబ్బును నామినీ లేదా వారసులకు ఖాతాల్లోకి బదిలీ చేస్తారు.

ఎస్‌బీఐ ఖాతాల్లో ఉన్న అన్‌క్లెయిమ్డ్ డిపాజిట్స్ చెక్ చేయడానికి.. ఇక్కడ క్లిక్ చేయండి.

పంజాబ్‌ నేషనల్‌ బ్యాంక్‌ ఖాతాల్లో ఉన్న అన్‌క్లెయిమ్డ్ డిపాజిట్స్ చెక్ చేయడానికి.. ఇక్కడ క్లిక్ చేయండి.

కెనరా బ్యాంక్‌ ఖాతాల్లో ఉన్న అన్‌క్లెయిమ్డ్ డిపాజిట్స్ చెక్ చేయడానికి.. ఇక్కడ క్లిక్ చేయండి.

బ్యాంక్‌ ఆఫ్‌ బరోడా ఖాతాల్లో ఉన్న అన్‌క్లెయిమ్డ్ డిపాజిట్స్ చెక్ చేయడానికి.. ఇక్కడ క్లిక్ చేయండి.