డీజీసీఏ కొత్త నిబంధనలు.. విమానం రద్దయితే ప్రయాణికునికి 10 వేలు

వాతావరణ సమస్యలు కాకుండా, సాంకేతిక కారణాలని, ఇంకేవో కారణాలు చెప్పి విమానాలు రద్దు చేసే సందర్భాలు కోకొల్లలు. దీనివల్ల ప్రయాణికులు తీవ్ర ఇబ్బందులు ఎదుర్కుంటుంటారు. విమానయాన సంస్థలు ఇలా ఇష్టారీతిన విమానాలను రద్దు చేయటంపై డైరెక్టరేట్‌ జనరల్‌ ఆఫ్‌ సివిల్‌ ఏవియేషన్‌ (డీజీసీఏ)కు పెద్ద ఎత్తున ఫిర్యాదులు వెల్లువెత్తాయి. ఈ క్రమంలో డీజీసీఏ అప్రమత్తమైంది. దేశీయ విమానయాన సంస్థలు తమ ప్రయాణికులకు మరింత సమర్థవంతంగా, కచ్చితమైన సమయపాలనతో సేవలు అందించేలా కొత్త నిబంధనలు రూపొందించింది.

వీటి ప్రకారం.. విమానయాన సంస్థలు మీ వద్ద టికెట్ ఉండి బోర్డింగ్ సమయంలో ఫ్లైట్ ఎక్కించుకోకపోతే.. మీకు రూ.20 వేలు నష్ట పరిహారం అందనుంది. ఒకవేళ ఫ్లైట్ రద్దయితే పాసింజర్లకు సంబంధిత ఎయిర్​లైన్స్​ సంస్థలు రూ.10వేల వరకు పరిహారం చెల్లించాల్సి ఉంటుంది. ఇలాంటి ఉదంతాల్లో ఇప్పటి వరకూ రూ.4 వేలుగా ఉన్న పరిహారాన్ని అన్ని వర్గాలతో చర్చల అనంతరం భారీగా పెంచింది. వచ్చే ఏడాది ఫిబ్రవరిలో ఈ రూల్స్ అమలవుతాయని సమాచారం.

విమానయాన సంస్థలకు డీజీసీఏ మార్గదర్శకాలు:

• విమానయాన సంస్థలు, విమానాన్ని రద్దు చేయాలని భావిస్తే.. రెండు వారాల ముందుగానే ప్రయాణికులకు సమాచారం ఇచ్చి.. ప్రత్యామ్నాయ విమానంలో సీటు ఏర్పాటు చేయాలి.
• ప్రయాణానికి 24 గంటలలోపు లేదా రెండు వారాల లోపు​ రద్దు చేస్తే.. ప్రత్యామ్నాయ విమానాన్ని ఏర్పాటు చేయాలి లేదా టికెట్​ సొమ్మును తిరిగి చెల్లించాలి.
• 24 గంటల కంటే తక్కువ వ్యవధిలో విమానాన్ని రద్దు చేస్తే.. టికెట్‌ రుసుముతో పాటు, పరిహారం చెల్లించాలి.
• 2 గంటల కంటే ఎక్కువ సమయమైతే అత్యధికంగా (వన్‌ వే ఫేర్‌ + ఇంధన ఖర్చు) రూ.10 వేలు, 1-2 గంటల మధ్య అయితే అత్యధికంగా రూ.7,500, 1 గంటలోపైతే అత్యధికంగా రూ.5 వేలు చెల్లించాలి.
• బుకింగ్‌ కన్ఫర్మ్‌ అయ్యి, బోర్డింగ్‌కు అనుమతించకపోతే ప్రయాణ సమయానికి గంటలోపు వేరే విమానం సిద్ధంగా ఉంచాలి.
• 24 గంటలలోపు వేరే విమానాన్ని సిద్ధం చేయాల్సి వస్తే అత్యధికంగా రూ.10 వేలు ప్రయాణికుడికి విమాన సంస్థలు చెల్లించాలి.
• 24 గంటల తర్వాత కూడా ఏర్పాటు చేయకపోతే అత్యధికంగా రూ.20 వేలు చెల్లించాలి.
• ప్రయాణికుడి అనుమతి లేకుండా ఎక్కువ క్లాస్‌ టికెట్‌ ను .. తక్కువ క్లాస్‌ టికెట్‌ కేటాయిస్తే టికెట్‌ చార్జీలు, ట్యాక్స్‌తో సహా చెల్లించాలి. తదుపరి అందుబాటులో ఉన్న క్లాసులో విమాన సంస్థ ఉచిత ప్రయాణం కల్పించాలి.