follow us:
బంగారం ఎల్లప్పుడూ ప్రజలకు అంత్యంత ప్రీతిప్రాతమైన వస్తువే. ఆడ, మగ అనే తేడా లేకుండా అందరూ బంగారం ధరించడాన్ని ఇష్టపడతారు. ముఖ్యంగా అక్షయ తృతీయ సందర్భంగా బంగారాన్ని కొనుగోలు చేయడం కొందరు శుభసూచికంగా భావిస్తారు. లక్ష్మీ కటాక్షం పొందాలంటే ‘అక్షయ తృతీయ‘ నాడు బంగారం కొనాలన్నది ప్రజల నమ్మకం. అందుకే డబ్బులున్నా, లేకపోయినా.. ఆ రోజు బంగారం కొనాలనుకుంటారు. హిందూ పంచాంగం ప్రకారం, ప్రతి సంవత్సరం వైశాఖ మాసంలో శుక్ల పక్షం యొక్క తృతీయ తిథిలో అక్షయ తృతీయ పండుగను జరుపుకుంటారు. ఈ సంవత్సరం అక్షయ తృతీయ మే 3న(మంగళవారం) రానుంది.
ప్రస్తుతం బంగారం ధరలు ఆకాశాన్ని అంటుతున్నాయి. ఈ సమయంలో కాస్త అజాగ్రత్త వహించిన చాలా నష్టానికి దారి తీస్తుంది. అక్షయ తృతీయ సందర్భంగా బంగారాన్ని కొనుగోలు చేయాలనుకునేవారికి కొన్ని జాగ్రత్తలు తెలియజేస్తున్నాం.
బంగారం బరువు విషయంలో జాగ్రత్త..
బంగారం కొనుగోలు చేసేటప్పుడు దాని బరువును ఒకటికి నాలుగు సార్లు తనిఖీ చేయించడం ఉత్తమం. బరువులో కాస్త తేడా ఉన్నా అది నష్టాన్ని కలిగిస్తుంది. కనుక, బంగారం కొనేటప్పుడు శ్రద్దగా ఉండండి.
హాల్‌మార్క్ ఉన్న బంగారాన్ని మాత్రమే కొనండి
బంగారం కొనాలనుకున్నప్పుడు మీరు విశ్వసించే దుకాణానికి మాత్రమే వెళ్లాలి. అంతేకాదు.. హాల్‌మార్క్ చేసిన బంగారాన్ని కొనుగోలు చేయడం తప్పనిసరి. హాల్‌మార్క్ బంగారం స్వచ్ఛతకు ప్రభుత్వ హామీ. ఇందులో 24 క్యారెట్ల బంగారంపై 999 హాల్‌మార్క్, 22 క్యారెట్‌లపై 916 అనే హాల్‌మార్క్ గుర్తించాలి. ఈ నంబర్ల ద్వారా మీరు కొనుగోలు చేసిన బంగారం ఎంత స్వచ్ఛమైనదో తెలుసుకోవచ్చు.
హాల్‌మార్క్‌తో పాటు బ్యూరో ఆఫ్ ఇండియన్ స్టాండర్డ్స్(బీఐఎస్) యొక్క త్రిభుజాకార గుర్తు ఉంటుంది. బీఐఎస్ లోగో, బంగారు సంఖ్య (స్వచ్ఛత, 24 క్యారెట్‌లకు 999 హాల్‌మార్క్), అసెస్‌మెంట్ సెంటర్, ఆభరణాల తయారీ గుర్తుతో పాటు హాల్‌మార్కింగ్ సంవత్సరం కూడా వ్రాయబడుతుంది. వీటన్నింటిని జాగ్రత్తగా చూసి బంగారాన్ని కొనుగోలుచేయాలి.
మేకింగ్ చార్జీలపై శ్రద్ధ..
బంగారు ఆభరణాల ధర మార్కెట్‌ను బట్టి రోజువారిగా మారుతూ ఉంటుంది. కొన్నిసార్లు ఒకే మార్కెట్‌లోని వేర్వేరు స్వర్ణకారులు వేర్వేరు చార్జీలను విధిస్తారు. బంగారం ధర ఒకేలా ఉన్నప్పటికీ, మేకింగ్ చార్జీలు, లేబర్ చార్జీలు అంటూ ధరలో కాస్త తేడా ఉంటుంది. మేకింగ్ ఛార్జీలకు సంబంధించి ప్రభుత్వ మార్గదర్శకాలు లేవు. తయారీదారుడు తన ఖర్చుకు అనుగుణంగా 2 శాతం నుండి 20 శాతం వరకు మేకింగ్ చార్జీలు నిర్ణయిస్తాడు. ఇది కూడా నగల డిజైన్ ప్రకారం నిర్ణయించబడుతుంది. ఈ విషయంలో కాస్త అప్రమత్తత అవసరం.
తరుగు విషయంలో జాగ్రత్త..
తరుగు.. స్వచ్ఛమైన బంగారాన్ని ఆభరణంగా మార్చే క్రమంలో కొంత వృధా ఉంటుంది. కటింగ్, సోల్డరింగ్, కరిగించే క్రమంలో ఇలా జరుగుతుంది. దీన్ని వేస్టేజ్ లేదా తరుగుగా చెప్తుంటారు. ఆభరణాన్ని బట్టి దీన్ని తయారీదారులు నిర్ణయిస్తారు. ఈ వృధా చార్జీలు 3 నుంచి 25 శాతం వరకు ఉంటాయి. దీన్ని మాజూరి/తరుగు/వేస్టేజ్, లేక వీ ఏ (వాల్యూ యాడెడ్) అంటారు. ఈ వేస్టేజ్ అనేది నగల యొక్క డిజైన్, తయారీ విధానాన్ని అనుసరించి మారుతూ ఉంటుంది. దీని విషయంలో కూడా చాలా శ్రద్ధ అవసరం.
నాణేల కొనుగులు విషయంలో..
చాలా మంది బంగారు నాణేలను పెట్టుబడిగా కొనుగోలు చేస్తారు. కొంతమంది ఈ నాణేలను వారి సమీపంలోని దుకాణాల నుండి కొనుగోలు చేస్తారు. మరి కొందరు మాత్రం బ్యాంకులు, పోస్టాఫీసుల నుండి కొనుగోలు చేస్తుంటారు. ఇక్కడ బ్యాంకులు నాణేలను విక్రయిస్తున్నప్పటికీ, సెంట్రల్ బ్యాంక్ నిబంధనల ప్రకారం, ఆ నాణేలను వెనక్కి తీసుకోవట్లేదు అన్నది నిజం. కాబట్టి నాణేలు కొనుగోలు చేసేటప్పుడు ఈ విషయాన్ని గుర్తుంచుకోండి.
