కరోనా పేషేంట్లకి పోలీసుల ఆపన్నహస్తం…

కరోనా వేళ వైరస్ సంక్రమించిన వారు ఎన్నో ఇబ్బందులు పడుతున్న సంగతి తెలిసిందే. హోం ఐసోలేషన్‌లో ఉండే వారు తిండికి సైతం ఇబ్బంది పడాల్సిన పరిస్థితి ఉంటోంది. ఇక కుటుంబంలో అందరూ కొవిడ్ బారిన పడి హోం ఐసోలేషన్‌లో ఉంటే వారి తిప్పలు వర్ణనాతీతం. భోజనం చేసుకోలేక సతమతమవుతుంటారు. ఈ నేపధ్యంలో రాష్ట్ర పోలీసులు మరో మంచి కార్యక్రమానికి శ్రీకారం చుట్టారు. కరోనా సోకి హోం ఐసో లేషన్‌లో ఉన్న వ్యక్తుల ఇంటి వద్దకే ఆహారం ఉచిత సరఫరా చేపట్టారు. సేవా ఆహార్‌ పేరుతో సత్యసాయి సేవా సంస్థ, హోప్‌ స్వచ్ఛంద సంస్థతో కలిసి ఈ కార్యక్రమాన్ని ప్రారంభించారు.స్విగ్గీ, బిగ్‌ బాస్కెట్‌ వంటి ఫుడ్‌ డెలివరీ సంస్థలు ఇందుకు సహకారం అందిస్తున్నాయి. ప్రస్తుతానికి ఈ సేవలు గ్రేటర్‌ హైదరాబాద్‌ పరిధిలోనే కొనసాగించనున్నారు. దాతలు, ఫుడ్‌ డెలివరీ సంస్థలు ముందుకు వస్తే త్వరలో రాష్ట్రవ్యాప్తంగా విస్తరించనున్నారు. ఈ సేవా ఆహార్‌ పథకంలో భాగంగా రెండు రకాలుగా ఉచితంగా ఆహారం కోసం ఆర్డర్‌ చేయవచ్చు. మొదటిది 7799616163 ఫోన్‌ నంబర్‌కు వాట్సాప్‌లో ఉదయం 7 గంటలలోపు రిక్వెస్ట్ పంపాలి. ఆ తర్వాత చేస్తే దాన్ని మరుసటి రోజు ఆర్డర్‌ కింద లెక్కగడతారు. సేవా ఆహార్‌ యాప్‌ ద్వారా కూడా ఆర్డర్‌ చేయవచ్చు. ఈ యాప్‌ రెండురోజుల్లో అందుబాటులోకి రానుంది. ఆర్డర్‌ సమయంలో రోగి పేరు, నివసిస్తున్న ప్రాంతం, కాంటాక్ట్‌ నంబర్, ఇంట్లో పాజిటివ్‌లు ఎంత మంది ఉన్నార? తదితర వివరాలను నమోదు చేయాలి. వీరికి ఐదురోజుల పాటు ఉచితంగా ఆహారం అందిస్తారు. ఇలా రోజుకు వెయ్యి నుంచి గరిష్ఠంగా 2 వేల మందికి నాణ్యమైన ఆహారాన్ని సరఫరా చేస్తారు. ఇందులో వృద్ధులు, చిన్నారులకు ప్రాధాన్యం ఇస్తారు. సేవా ఆహార్‌ కార్యక్రమాన్ని సత్యసాయిసేవా సంస్థతో పాటు విమెన్‌ సేఫ్టీ వింగ్‌ చీఫ్, ఏడీజీ స్వాతీ లక్రా, డీఐజీ బడుగుల సుమతి పర్యవేక్షిస్తున్నారు.