కొన్ని లింక్స్ క్లిక్ చేస్తే మీ సమాచారం సైబర్ నేరగాళ్ళకి చేరవేసినట్లే!

ప్రస్తుతం కోవిడ్‌ -19 పరిస్థితులను, ప్రజల భయాందోళలను సైబర్‌ నేరగాళ్లు సొమ్ము చేసుకుంటున్నారు. ఎస్‌ఎంఎస్‌ వర్మ్‌ అనే మాల్‌వేర్‌ ద్వారా సైబర్ కేటుగాళ్లు ఇండియాలోని ఆండ్రాయిడ్‌ వినియోగదారులను టార్గెట్‌ చేస్తున్నట్లు తెలుస్తోంది. మాల్‌వేర్‌ ప్రభావంతో కొందరు నెటిజన్లు నకిలీ కొవిడ్‌ వ్యాక్సిన్‌ రిజిస్ట్రేషన్‌ యాప్‌ను డౌన్‌లోడ్‌ చేసుకుని వారి వ్యక్తిగత సమాచారం అంతా ఇచ్చేస్తున్నారు. కొవిడ్‌ నేపథ్యంలో ఆండ్రాయిడ్‌ వినియోగదారులకు వరదలా వచ్చే సోషల్‌ మీడియా/ఆన్‌లైన్‌ ప్రకటనలపై అప్రమత్తంగా ఉండాలని సైబర్ నిపుణులు హెచ్చరిస్తున్నారు. కొవిడ్‌-19 వ్యాక్సిన్‌ కోసం రిజిస్ట్రేషన్‌ చేసుకోండంటూ సైబర్‌ మోసగాళ్లు ఆండ్రాయిడ్‌ వినియోగదారులకు ఎస్‌ఎంఎస్‌ పంపుతారు. అందుకోసం అప్లికేషన్‌ డౌన్‌లోడ్‌ లింక్స్‌ క్లిక్ చేయాలని సూచిస్తారు. వారు పంపిన ‘కోవిడ్‌ వ్యాక్సినేషన్‌ రిజిస్టర్‌ యాప్‌’ లింక్‌పై క్లిక్‌ చేయగానే మాల్‌వేర్‌ సిస్టంలోకి చేరుతోంది. ఈ నకిలీ యాప్‌ ద్వారా వినియోగదారుల వ్యక్తిగత సమాచారాన్నంతా సేకరిస్తారు. దాని ద్వారా బ్యాంక్ అకౌంట్ల వివరాలు తెలుసుకుని ఖాతాలను ఖాళీ చేసేస్తారు. నకిలీ యాప్‌, నకిలీ ఎస్‌ఎంఎస్‌ల ప్రమాదకర లింకులు బాధితులకు ఉన్న ఇతర కాంటాక్టులకు కూడా వెళ్తున్నాయి. ఓటీపీ, పిన్‌నెం. ఆధార్‌ నెం, క్రెడిట్‌/డెబిట్‌ కార్డు వివరాలు తదితర వ్యక్తిగత సమాచారం ఎవరికీ షేర్‌ చేయవద్దు. రక్షణ కోసం సెక్యూరిటీ ప్యాచెస్‌ను ఇన్‌స్టాల్‌ చేసుకోవాలి. కొవిడ్‌ వ్యాక్సినేషన్‌ రిజిస్ట్రేషన్‌ కోసం ప్రామాణికత కలిగిన ప్రభుత్వ వెబ్‌సైట్స్‌ (కొవిన్‌ పోర్టల్‌ / ఆరోగ్య సేతు/UMANG మొబైల్‌ అప్లికేషన్‌)ను మాత్రమే వాడాలి.