తెలంగాణలోని మహబూబాబాద్‌లో ఓ నిత్య పెళ్లి కూతురు బండారం బయటపడింది. ఒకటి కాదు.. రెండు కాదు.. ఈ నిత్య పెళ్లి కూతురు ఒకరికి తెలియకుండా ఒకరిని ఇలా తొమ్మిది మందిని పెళ్లాడింది. తొమ్మిదో భర్తతో బెంగుళూర్​లో కాపురం పెట్టింది. కొంతకాలం బాగానే గడించింది.. అంతలోనే తొమ్మిదో భర్తకు ఊహించని షాక్ ఇచ్చింది. చివరకు భార్యాభర్తల గొడవ పోలీసుల చెంతకు చేరగా.. ఆమె పెళ్లి లీలలు బయట పడ్డాయి. వివరాల్లోకి వెళ్తే..

మహబూబాబాద్ జిల్లా కేంద్రానికి చెందిన స్వప్నకు కృష్ణా జిల్లా గంపలగూడెంకు చెందిన వెంకటేశ్​తో ఓ మ్యాట్రిమోని వెబ్‌సైట్​లో పరిచయమైంది. వెంకటేశ్ బెంగుళూరులో సాఫ్ట్​వేర్ ఉద్యోగం చేస్తున్నాడు. వీరిద్దరి పరిచయం కాస్తా పెళ్లికి దారి తీసింది. మూడేళ్ల క్రితం వీరి వివాహం జరిగింది.. దంపతులు బెంగుళూరులో కాపురం పెట్టారు. పెళ్లి జరిగిన తర్వాత కొన్ని నెలల పాటు బాగానే కలిసి ఉన్నారు. ఆ సమయంలో స్వప్న తరుచూ ఫోన్‌లో మాట్లాడుతూ, కోర్టు విషయాలలో తలమునకలై ఉండేదని, ఏంటని ప్రశ్నిస్తే తనతో గొడవలకు దిగేదని భర్త చెబుతున్నాడు. ఓ రోజు బెంగుళూరు నుంచి ఆకస్మాత్తుగా హైదరాబాద్ వెళ్లాలని పట్టుబడిందని వెళ్లి వచ్చిన తర్వాత మళ్లీ వెళ్లాలని అనడంతో అనుమానం వచ్చి భర్త ఆరా తీశాడు. స్వప్నకు సంబంధించిన వివరాలు వెంకటేశ్ సేకరించాడు. అసలు విషయం తెలుసుకున్న వెంకటేశ్ కి మైండ్ బ్లాక్ అయ్యింది.

ఆమె తన కంటే ముందు ఎనిమిది మందిని పెళ్లి చేసుకున్న విషయం తెలుసుకొని షాక్ కి గురయ్యాడు. ఇలాంటి మహిళతో తానుండలేనని భావించి తనకు విడాకులు ఇవ్వాలని స్వప్నను కోరాడు వెంకటేశ్. దానికి ఆమె ససేమిరా అంది.. విడాకులు ఇవ్వకపోవడమే గాక తిరిగి భర్తపై పోలీసులకు ఫిర్యాదు చేసింది. ఫిర్యాదులో భర్తే తన కంటే ముందు అనేక పెళ్లిళ్లు చేసుకున్నాడని పేర్కొంది.. తనకు న్యాయం చేయాలంటూ మహబూబాబాద్ పోలీస్ స్టేషన్ ముందు బైఠాయించింది. విషయం తెలుసుకున్న వెంకటేశ్ సాక్ష్యాధారాలతో సహా పోలీసుల వద్దకు చేరుకున్నాడు. ఆమె వివాహమాడిన ఎనిమిది మంది వివరాలను పోలీసుల ముందుంచాడు. వారిలో కొంత మంది మరణించారని పోలీసులకు తెలిపాడు. ఇద్దరి ఫిర్యాదులు తీసుకున్న పోలీసులు ఇరువురిపై కేసు నమోదు చేసుకొని దర్యాప్తు చేస్తున్నారు. ఈ విషయం పై మీ అభిప్రాయాలు కామెంట్స్ రూపంలో తెలియజేయండి.