దీనస్థితిలో బాలకృష్ణ నిర్మాత గుర్తుపట్టలేకపోయిన కలెక్టర్ | Balakrishna Producer Chengala Venkat Rao

   దీనస్థితిలో బాలకృష్ణ నిర్మాత గుర్తుపట్టలేకపోయిన కలెక్టర్ |

  చెంగల వెంకట్రావు.. ఈ పేరు చెబితే మనకు ముందుగా గుర్తొచ్చేది ‘సమర సింహారెడ్డి’. రాయలసీమ ఫ్యాక్షనిజం నేపథ్యంలో తెరకెక్కిన ఈ సినిమా అప్పట్లో రికార్డులను తిరగరాసింది. బాలకృష్ణ కెరీర్లో కమర్షియల్గా అత్యంత విజయవంతమైన సినిమాగా తెలుగు సినీ చరిత్రలో నిలిచిపోయింది. ఆ తర్వాత తీసిన నర్సింహనాయుడు సైతం మరో సూపర్ డూపర్ హిట్. అలాంటి చిత్రాలను నిర్మించిన నిర్మాత, పాయకరావుపేట మాజీ ఎమ్మెల్యే చెంగల ఇప్పుడు దీనస్థితిలో ఉన్నారు. హత్యకేసులో యావజ్జీవ శిక్ష అనుభవిస్తున్న ఆయన.. అనారోగ్యంతో ఉన్న ఖైదీగా విశాఖ కేజీహెచ్లో చికిత్స పొందుతున్నారు. మలేరియా బాధితులను పరామర్శించేందుకు వచ్చిన కలెక్టర్ ప్రవీణ్ కుమార్.. అక్కడే ఉన్న ఖైదీలు చికిత్స పొందే విభాగాన్ని పరిశీలించారు. అందరు ఖైదీల్లాగానే చెంగలను పలకరించారు. అయితే..

   ఆయన సినీ నిర్మాత, మాజీ ఎమ్మెల్యే అని తెలుసుకుని కలెక్టర్ ఆశ్చర్యానికి గురయ్యారు. వైద్యం సక్రమంగా అందుతోందా అని చెంగలను కలెక్టర్ అడిగి తెలుసుకున్నారు.‘సమర సింహారెడ్డి’ సినిమా సూపర్ డూపర్ హిట్ కావడంతో నిర్మాత చెంగలపై బాలకృష్ణకు ప్రత్యేక అభిమానం ఏర్పడింది. ఆయన సిఫారుతోనే తెలగుదేశం పార్టీ ఎమ్మెల్యే టిక్కెట్ కూడా దక్కింది. 2004 అసెంబ్లీ ఎన్నికల్లో పాయకరావుపేట నుంచి ఎమ్మెల్యేగా ఎన్నికయ్యారు. ఎమ్మెల్యేగా ఉన్న సమయంలో 2007లో నక్కపల్లి మండలం బంగారమ్మపేట అనే మత్స్యకార గ్రామంలో బీచ్ మినరల్స్ కంపెనీ పెట్టడానికి ప్రయత్నాలు జరిగాయి. అయితే దాన్ని చెంగల వ్యతిరేకించారు.

  గ్రామసభ జరిగినప్పుడు ఎమ్మెల్యే చెంగల సహా ఆయన అనుచరవర్గం పరిశ్రమ పెట్టడానికి వీల్లేదని ఖరాఖండిగా చెప్పింది. కానీ మరో వర్గం పరిశ్రమను పెట్టితీరాలని వాదించింది. దీంతో అక్కడ ఇరువర్గాల మధ్య గొడవ జరిగింది. కొట్లాటలో ఒక మత్స్యకారుడు మరణించాడు.మత్స్యకారుడు మరణానికి చెంగల వెంకట్రావు, అతని అనుచరులే కారణమంటూ అవతలి వర్గం కేసు పెట్టింది. దాదాపు పదేళ్లపాటు విఛారణ అనంతరం 2017 మే 24న అనకాపల్లిలోని జిల్లా సెషన్స్ జడ్జి కోర్టు చెంగల సహా 21 మందికి యావజ్జీవ కారాగార శిక్ష విధించింది. అప్పటి నుంచి చెంగల విశాఖపట్నంలోని సెంట్రల్ జైలులో ఖైదీగా జీవితం గడుపుతున్నారు. ఇటీవల వెంకట్రావు అనారోగ్యానికి గురికావడంతో కేజీహెచ్కు తరలించారు. అక్కడ కూడా ఖైదీలను ఉంచే సెల్లోనే ఆయన్ను పెట్టి చికిత్స అందిస్తున్నారు. సమరసింహారెడ్డి, నరసింహనాయుడు వంటి ఎవర్ గ్రీన్ బ్లాక్ బస్టర్ చిత్రాలను నిర్మించిన వెంకట్రావ్ జూనియర్ ఎన్టీఆర్ తో తీసిన నర్సింహుడు చిత్రం పాతాళానికి తొక్కేసింది. సినిమా బిజినెస్ సరిగా జరగకపోవడంతో అప్పులపాలైన ఆయన ఓ దశలో ఇక చావే శరణ్యం అనుకుని హుస్సేన్ సాగర్ లోకి దూకేశారు. అక్కడే ఉన్న పోలీసులు రక్షించడంతో ప్రాణాలు నిలిచాయి. ఓడలు బండ్లు.. బండ్లు ఓడలు అవుతాయి అంటే ఇదేనేమో!

Comments